تاوبٹ نیلم ویلی کا ایک سب سے خوبصورت گاوں ہے اور یہ ضلع نیلم کی شاردہ تحصیل کا حصہ ہے۔ تاوبٹ مظفرآباد سے لگ بھگ 200 کلو میٹر اور کیل (تحصیل ہیڈ کوارٹر) سے 39 کلو میٹر دور ہے۔ تاوبٹ تک سٹرک مظفرآباد سے دریائے نیلم کے کنارے کنارے جاتی ہے جس کا نام نیلم روڈ ہے۔ یاد رہے کہ یہی روڈ سب سے آسان اور بہتر ہے۔ جبکہ کچھ لوگ براستہ ناران کاغان بھی نیلم ویلی میں آتے ہیں لیکن وہ سٹرک خطرناک ہو سکتی ہے۔ لہذا مظفرآباد سے بذریعہ نیلم روڈ پہلے آٹھمقام ، کیرن، شاردہ ، کیل (اڑنگ کیل) اور پھر تاوبٹ آ سکتے ہیں۔
تاوبٹ میں اپریل سے ٹوریسٹ سیزن شروع ہو جاتا ہے۔ جبکہ اپریل میں ٹھنڈ ہوتی ہے جبکہ مئی میں رات کے وقت ٹھنڈ اور دن کو گرمی ہوتی ہے۔ البتہ مئی کے بعد سے اکتوبر تک معتدل سا موسم ہوتا ہے۔ نومبر کی صورتحال اپریل جیسی ہوتی ہے۔ دسمبر میں سخت خشک سردی یا برف باری ہوتی ہے جبکہ جنوری سے مارچ تک مکمل برف باری کے ساتھ ساتھ کیل سے تاوبٹ تک سڑک مکمل بند ہوتی ہے۔
